沈集成旗下現有馬匹二十七駒，與一年前的陣容比較，縱使未至於面目全非，也有頗大的變化。

單以過去一年內曾經取勝的沈廐馬為例，其中五駒其後已退役，包括兩捷的「座頭市」，另有兩匹頭馬轉倉，包括兩捷的「新意思」。

單憑現有之兵力，新季沈廐要保持成績唔倒退怕且好難，甚至大膽講一句，頭馬數字要達標都可能唔係一件容易的事，幸好其現有馬匹普遍較為年輕，戰鬥力較強，假如其中有三、四匹能夠起個孖，則形勢尚未至於太悲觀。而另外一個辦法，就係盡力省靚自己個招牌，吸引多些馬匹加盟。

季尾來投的「金財子」，在姚本輝馬房時，陣上演出已擺明是匹特別適合谷戰之馬。由去年三月起，到今年七月止，田草跑了四場，最少都輸八又四分一馬位，泥地亦跑過兩場，都大敗。相反，谷草跑過五場，路程由一千到一哩，除了拉士一場沿途走外疊蝕位而輸得遠之外，最多只輸四又四分一馬位。

此外，呢隻馬曾於去年十一月十四日過海試閘跑千二，由頭帶到尾，直路只係臨尾推了幾下，反觀旁邊的「寶成智星」入直路即開始力推，但騎來騎去都過唔到頭。「金財子」新季只需疊埋心水專攻快活谷，必能打開勝利之門。